කළුතර ඥානෝදය මහා විද්යාලයේ දරු දැරියන්ගේ ක්රීඩා කුසලතා තවදුරටත් වර්ධනය කිරීම සහ ඔවුන්ට නව ක්රීඩා අවස්ථාවන් ලබාදීමේ අරමුණින් ඉදි කිරීමට නියමිත පිහිනුම් තටාකය සඳහා අරමුදල් රැස් කිරීමේ විශේෂ සංගීත ප්රසංගයේ පළමු ප්රවේශපත්රය පසුගිය දා පාසල් පරිශ්රයේදී නිකුත් කෙරිණි.
විදුහල්පතිතුමාගේ ප්රධානත්වයෙන් පැවති මෙම විශේෂ අවස්ථාව සඳහා විශේෂ ආරාධිත අමුත්තන්, ආචාර්ය මණ්ඩලය, පාසල් සිසු දරු දැරියන්, දෙමාපියන්, ආදි ශිෂ්යයන් සහ පාසල සමඟ සමීපව කටයුතු කරන පිරිසක් එක්ව සිටියහ.
පාසලේ දරු දැරියන් වෙනුවෙන් අනාගතයට වටිනා පහසුකමක් නිර්මාණය කිරීමේ අරමුණින් ක්රියාත්මක වන මෙම පිහිනුම් තටාක ව්යාපෘතිය, ඥානෝදය මහා විද්යාලයේ අධ්යාපනික හා ක්රීඩා ක්ෂේත්රයේ තවත් වැදගත් පියවරක් ලෙස සැලකිය හැකිය.
පිහිනුම් ක්රීඩාව තුළින් දරු දැරියන්ගේ ශාරීරික හැකියාවන්, විනය, ආත්ම විශ්වාසය, කණ්ඩායම් හැඟීම සහ තරගකාරී හැකියාවන් වර්ධනය කිරීමට හැකි වන අතර, පාසල තුළම සුදුසු පහසුකම් ඇති කිරීම මඟින් එම ක්රීඩා හැකියාවන් තවදුරටත් ඉදිරියට ගෙන යාමට අවස්ථාව සැලසෙනු ඇත.
මෙම දැවැන්ත කාර්යය සාර්ථක කර ගැනීම සඳහා අවශ්ය අරමුදල් රැස් කිරීම වෙනුවෙන් සංවිධානය කරන සංගීත ප්රසංගය පාසල් ප්රජාව පමණක් නොව, කළුතර ප්රදේශයේ ජනතාවද එක් කර ගන්නා සුවිශේෂී අවස්ථාවක් බවට පත් කිරීමට සංවිධායක මණ්ඩලය බලාපොරොත්තු වේ.
එමෙන්ම මෙම සංගීත ප්රසංගය හරහා රැස්කර ගන්නා අරමුදල් දරු දැරියන්ගේ අනාගතය වෙනුවෙන් ඉදිවන පිහිනුම් තටාකයේ කටයුතු සඳහා යොදා ගැනීමට නියමිත බැවින්, මෙම කාර්යය සඳහා ලබාදෙන සෑම සහයෝගයක්ම දරුවන්ගේ අනාගතයට කරන වටිනා දායකත්වයක් වනු ඇත.
අද උදෑසන පළමු ප්රවේශපත්රය නිකුත් කිරීමත් සමඟ මෙම සුවිශේෂී වැඩසටහනේ නිල ගමන ආරම්භ වූ අතර, ඉදිරියේදී තවත් පිරිසක් මෙම මහඟු කාර්යය සමඟ එක්වනු ඇතැයි අපේක්ෂා කෙරේ.
දරු දැරියන්ගේ ක්රීඩා සිහිනය සැබෑ කරමින්, ඔවුන් වෙනුවෙන් වටිනා අනාගතයක් ගොඩනැගීමට අපි සියලු දෙනා එක්වෙමු.
පසුගිය දා පාසල් පරිශ්රයේදී පැවති පළමු ප්රවේශපත්ර නිකුත් කිරීමේ අවස්ථාවේ විශේෂ අවස්ථා කිහිපයක් මෙසේයි.
